簡單。不簡單之法式紅酒炆牛𦟌
大家如果跟我年紀相近，小時候一定睇過「飄零燕」這套卡通片！裡面海廸的爺爺經常煮一大煲肉，然後點麵包食！當時我總覺得呢煲嘢好似好好食，而且食極都有的！經過我明查暗訪，搜集充足資料後，我決定要煮一次呢煲食極唔完，又啖啖肉嘅菜式😋
經過昨晚預先用紅酒醃定牛𦟌，今日再用多約兩個半小時去完成這道菜，卡通果然係煮得快趣啲😁
材料
。巴西牛𦟌，兩條「約兩磅」汆水洗淨後切大塊備用！
。紅蘿蔔，一條，刨皮切大舊！
。洋蔥，一個，切塊！
。薯仔，我用新薯仔六粒，切塊，用氣炸煱炸至金黃色備用！
。白磨菇，一盒，切片炒香備用！
。蕃茄，三小個，切大塊備用！
汁料/醃料
。紅酒一支
。上湯，500ml
。茄膏，兩湯匙
。香葉4片
。蒜頭8粒
。百里香香草兩條，又或用已磨碎的粉兩茶匙！
。鹽，適量！
做法
。預早一晚用紅酒，香葉，四粒蒜頭，百里香香草浸醃牛𦟌，以浸過牛𦟌為準！放雪櫃下層雪過夜！到煮之前2個小時取出，待回暖至室溫！
。夾起牛𦟌，用篩隔去剩下的紅酒汁備用，亦沖洗一下那些蒜頭及香葉備用！
。將牛𦟌平均撲上麵粉，燒熱油鑊將牛𦟌煎至兩面金黃色，剩起備用！
。再用原鑊爆香另外四粒蒜頭，順序爆香洋蔥，蕃茄，紅蘿蔔！
。加入已煎封過的牛𦟌及茄膏炒匀，倒入剩起的紅酒汁及上湯，兩茶匙百里香粉及剩起那些香葉及蒜頭，煮大滾後轉中火炆90分鐘@注意每15分鐘左右要翻炒一下，以免粘底😊
。在最後15分鐘加入已炸過的薯仔及炒過的磨菇，並加入適量的鹽調味即可！
Search